كتب : منصور الجزار وأميرة ربيع
بسم الله الرحمن الرحيم ( وَلَقَدْ جَاءَهُمْ مِنَ الأنْبَاءِ مَا فِيهِ مُزْدَجَرٌ ) صدق الله العظيم .
مع كامل الاحترام لمن سيتم ذكر أسماؤهم ومع الاحتفاظ بالألقاب لن أتحدث عن الأشخاص ولا عن الحياة الخاصة لأحد ..
لكنني سوف أتحدث بما كفله لى الدستور فى المادة ( 65 ) بخصوص حرية الرأي بالتعبير أو النشر أو الكتابة ومن يقاضيني فليقاضى الدستور أولا .
اخترت لمؤسسة الأنباء هذا الاسم من كتاب الله والآية واضحة وضوح الشمس لكل فاجر وكافر وظالم وفاسد ..
نبتدى الحكاية
لما عيون الرجالة تبص فى الأرض ومتقدرش تنطق .. يبقى الحكاية فيها إن ؟؟؟
لما الشنبات تدلدل واللسان ميقولش غير حاضر .. يبقى الحكاية فيها إن ؟؟؟
لما العيون تغمض عن الغلط وتمضى عميانى .. يبقى الحكاية فيها إن ؟؟؟
لما ست تخوف كل البلد بحماية الأمن ليها .. يبقى الحكاية فيها إن ؟؟؟
لما ست تبلغ أمن الدولة فى موظف كشف بلاويهـا.. يبقى الحكاية فيها إن ؟؟؟
لما محافظ ياريس يتورط فى هدم العملية التعليمية من غير مايتحقق ...
ولما المحافظ نطلبه تليفونيا 7 مرات وميردش .. يبقى الحكاية فيها إن ؟؟؟
وطول مافى البلد والحمد لله حد زى الغلبان كاتب هذه السطور ...وواحد زى رمضان الحسينى الشخصية الكبيرة سياسياً ومهنياً ..وواحد زى المتبرع الشريف النظيف المحامى الشهير ...اللى مش بيخافوا غير ربنا ...وغيرهم من شرفاء مدرسة المنصورة الثانوية بنات ...ومن خارجين على المعاش بالتعليم ومن قلب التعليم كتير شرفاء بيحاربوا الفساد سراً ..طالما لسه فيه مننا بيحارب فساد وظلم وبنحاول نقول الحق لربنا بس ...يبقى لسه النخوة موجودة ..ومش واحدة زى هويدا مسعد وانا بقولها علنى ومتحمل المسئولية كاملة وياريتها زى ماقالت علنى انها هترفع عليا قضية ...انا بقولها ياريت ترفعى عليا قضية ...أو مسمعش اسمي على لسانك عشان ضربتى القاضية مش هعلنها غير فى الفضائيات ...لو نخوة الرجالة اللى بتحميكى مظهرتش وموقفوش مع العدل والحق ورفع الظلم عن المظلومين ....ومتشغليش بالك بيا ..اصل انا قرصتى والقبر ..
كلامى واضح وأنا مش بهوش انا دوغرى وصريح ومحدش يقدر على ثمنى عشان تمنى الشرف والنزاهة والاحترام والوقوف خادم لكلمة الحق وعدل ربنا وانا بحاربك علنى بالمستندات ومن المقهورين والمظلومين منك ومش بخاف غير من ربنا بس ..
محافظ الدقهلية الجديد الدكتور المحترم كمال جاد ..
لشخصك كل الاحترام أولاً ...انك يادكتور تحط نظام وسياسة شغل .. دى حاجة هايلة !!!
لكن يادكتور متردش على تليفون وتخللى حد يرد مكانك .. دى حاجة مش هايلة !!
وكمان يادكتور الواتس مش انت اللى ترد عليه وموظف يرد على إعلاميين ردود مش حلوة ..
يبقى ده استخفاف بالدستور وبالإعلام ..ونراجع سوا المادة ( 68 ) اللى بتقول ( المعلومات والبيانات والإحصاءات والوثائق الرسمية ملك للشعب والإفصاح عنها من مصادرها المختلفة حق تكفله الدولة لكل مواطن وتلتزم الدولة بتوفيرها وإتاحتها للمواطنين بشفافية ... الخ ) ...( وقالت نفس المادة الأهم كما يحدد عقوبة حجب المعلومات او إعطاء معلومات مغلوطة عمداً .. الخ )
اللى يخصنا فى المادة دى يادكتور حاجة واحدة ..
لما حد يتصل بمحافظ يبقى لازم يكون مسئول او اعلامى او تنفيذى ..
لكن مش بتقابل حد ومنعت الاعلام من المجلس التنفيذى ومنعت النواب من خدمة ابناء دائرتهم وكمان متردش على تليفوناتنا عشان نبلغك ان فيه كارثة وبالفعل تم توريطك فيها ...!!!
يبقى مواطنين الدقهلية فى ثانية هيقولوا ايه على محافظ لسه جاى ومن غير دراية من فاسدين التعليم يورطوك فى انك تاخد قرار تخالف بيه القانون ..
المخالفة ببساطة اللى طلبناك بالتليفون ومردتش علينا هى :
ان امرأة تدير مدرسة وتدير منظومة كلها شنبات ( وأقسم بالله مابينى وبينها حاجة شخصية ولا هيكون معاها ولا مع غيرها ) ..
مجلس أمناء المدرسة رئيسه رمضان الحسينى رجل مشهود له بالسمعة الحسنة ورجل سياسى ونقابى بارز ورجل أعمال أعطى على حد علمنا الكثير للمدرسة وعندما حدثت اهانة له من إحدى الموظفات بالمدرسة ( مرفق شكواه بخصوص تلك الواقعة ) لمدير الادارة المشارك بالمهزلة التى نتحدث عنها ..نشوف المستند أولا ...
قدم شكواه لمدير الإدارة عبد الحميد موسى الذى لم يحرك ساكناً ...
وكانت الضربة الثانية فى توتر العلاقة بينهما أنه أحضر متبرعاً محامى شهير ليتبرع للمدرسة بمبلغ مالى لعدد طالبات بسيط غير قادرات على دفع المصروفات وعندما ذهب وجد المديرة تبلغه بعدد اكبر فقام بالاتصال برئيس مجلس الامناء الذى رد عليه بأنه حر فى دفع الكل او جزء وبدلا من دفعه لعدد 175 طالبة وجد المطلوب عدد 555 طالبة يعنى هيدفع 50 ألف جنيه فقام بدفع مبلغ 30 ألف مرة أولى ودفع 19900 جنيه ولم تذكرها بالمشاركة المجتمعية داخل مجلس الامناء ولم تبلغ الاخصائية الاجتماعية بمجلس الامناء لعمل ابحاث للطالبات المطلوب السداد عنهم ، والمتبرع لم يتسلم ايصال توريد ولم يتم اثبات التبرع .
نشوف المستندات ..
وده غير المستند القنبلة الذى لن يخرج الا فى الوقت المناسب ...
فما كان منها إلا أن قامت بالابلاغ عن رجل المتابعة الذى أثبت كذبها فى ادعاءاتها بل والتزوير فيما قدمته وكتب ذلك صراحة وطالب باستبعادها لحين انتهاء التحقيق معها ، ولم يتحقق معها وأبلغت عنه امن الدولة وهذه اهانة لموظف شريف وكان البطل فى التستر عليها عبد الحميد موسى مدير الادارة ولم تستبعد من فترة طويلة حتى الآن ..
وقدم رئيس مجلس الامناء شكواه لمدير الادارة ووكيل الوزارة ولمجلس امناء الادارة ولم يهتم به أحد .
وقدم شكوى جماعية بكل سلبيات المدرسة وأيضاً لم يهتم احد بل زاد بطشها وتخويفها لكل العاملين بالمدرسة بحجة انها تصرح دائما للجميع اللى هيتكلم ومش عاجبه شغلى يرحل من المدرسة ..
والمستندات التى بها كوارث ننشرها لتشاهدوا من يدير التعليم بالدقهلية ..
تحرك رئيس المجلس لدعم العملية التعليمية من ناحية ....
المساندون لمخالفة القانون وتوريط المحافظ على حل المجلس على عبد الرؤوف وكيل الوزارة بصفته وعبد الغنى الغازى الموجه العام للتربية الاجتماعية بصفته وعبد الحميد موسى مدير إدارة شرق بصفته وموجه التربية الاجتماعية بإدارة شرق التعليمية بصفته ورئيس مجلس أمناء المديرية بصفته ورئيس مجلس أمناء الإدارة محمود لبيب بصفته ....
قامت المديرة التى تدير التعليم من الباب الخلفى ياوزير التعليم ويارئيس الجمهورية بتقديم 8 استقالات بما فيها استقالتها للمكسور عنيهم امامها وبالمخالفات التالية للقانون دون اثبات الاستقالات او عرضها على المجلس :
ـــ قدمت استقالتها هى أولاً والقانون هنا صريح بعد رجوعنا لخبير فى التربية الإجتماعية والذى أفادنا بأن القانون واللائحة صريحة فى ذلك وهى ...
ــ تقديم 3 معلمين لاستقالات فردية ( وفيه مفاجأة مذهلة على واحد فيهم ) انه قبل الاستقالة كان شاهد عليها فى اجتماع سابق بأنها رفضت فيه الحضور ورفضت للوكيلة الحضور مكانها وحاولت ان لايتم الاجتماع ولكن الاجتماع تم بالفعل وهناك شكوى مقدمة بذلك رسمية ...
ــ تقديم استقالة من عضو مهتم ...
زى مستند اللائحة مابيقول
ــ تقديم 3 استقالات من أعضاء أولياء أمور ...
زى مستند اللائحة مابيقول
نروح ياسيادة المحافظ لدورك فى حل المجلس وقانونيته ولازم تحاسب اللى ورطوك ولا يصح ان يشاع عنك بالمنصورة انك تساند الباطل وتخالف القانون !!
واللائحة أمامك فى المستند
ولنا فى ادارة طلخا التعليمية مثل يتم تدريسه ويجب التعلم منه لأنه مجلس يدار بحرفية ..
وفى حالة الاتفاق النهائى على أنه ارتكب مخالفة جسيمة يتم فصله وبالفعل تم عمل صندوق وورقة ابداء راى ان كان ارتكب مخالفة جسيمة أم لا وتم التصويت بشفافية دون ضغط والجميع اعلنها صريحة ان العضو ارتكب مخالفة جسيمة من صحيح القانون وتم الموافقة الجماعية على فصله ...
أما أنت ياسيادة المحافظ فقمت بتوقيع قرار حل المجلس بمذكرة مافيا التعليم بالدقهلية وهم:
وكيل الوزارة والموجه العام بالمديرية ومدير ادارة شرق وموجه التربية الاجتماعية بالادارة ورئيس مجلس امناء المديرية ورئيس مجلس امناء الادارة وفوق رؤوسهم سيدة تدير هؤلاء ومخالفين القانون ...
فهل تصحح الاوضاع وتقضى معنا على الفساد وتضرب بيد من حديد ..
البلاوى والفساد كتير ياريس
البلاوى والفساد كتير ياوزير التعليم
البلاوى والفساد لسه كتير يادكتور كمال ..
كلها عندى فهل تضعون يدكم فى يدى
ام ستنصرون الباطل وتضيع هيبتكم
وللحديث بواقى مش بقية ( منصور الجزار )