بقلم: فاتن نصر
هذه المقالة تعبر عن رأى الكاتب وعلى مسئوليته دون
تدخل من الموقع...
دائما نسمع عن صراعات وشجارات وخلافات في بيوت لأسباب تبدو بسيطة...
على فكرة هذه الأمور البسيطة وراها أمور ليست بسيطة على
الإطلاق ولكن لا يمكن التعبير عنها ...
ولا يمكن يعرف الأسباب الحقيقية فيها إلا الزوجين فقط ولذلك التدخل في اي أمر بين اتنين
يوسع الفجوة والتي أصلا هي لا تحتاج لتدخل فقط تحتاج لمراجعة من كل طرف لنفسه في أغلب العلاقات الندية هي سبب رئيسي للمشاكل طبيعة الرجل تميل لاستعراض قوته
التي من خلالها يحتوي حواء التي أراد الله ان يرتبط بها فإذا وجد أمامه امرأة متنمرة ... جاهزة
للتحدي ...
وكأنها تستعد لخوض عركة من أجل السلطة فهو هنا من داخله يتملكه التحدي
ليقول لها ببساطة ورينا شطارتك ونكرر مقولة قالها أحد شيوخنا الأفاضل قمة ذكاء الست أن تتغابى مش عيب أبدا أن تبدي لزوجك ضعفك وهو الذي يدرك تماما أنك قوية
ولكنك مهما كنت قوية محتاجة له فهو سندك وأمانك ومع ما كتبته زوجة جميلة وجدت نفسها بعد أن رأت نموذجا مختلفا وقررت أن تعيش تجربتها ...
كتبت رحاب الجندي في يوميات امرأة عادية
==============
سؤال تصعب الإجابة عليه عند 75%من
سيدات مصر من الطبقة الوسطى هو إنتى ليه مش بتتدلعى ؟؟؟؟
بصراحه أنا واحدة من الستات اللى مالهمش فى الدلع ولا المياصه بسم الله ما شاء غفير الدرك ماشى
فى البيت نتيجه تربيه ما تعرفوا,...
أكل ملوث جايز ,...
إنتفاخات ممكن..
لكن النتيجة واحده إنى أنفع أشتغل فى حرس الحدود وإنى ضغطى بيعلى لما بشوف واحده
من الاخوة المايصين.
بس مرة من المرات جمعتنى بواحدة منهم رحلة 3 أيام طبعا أول يوم كان نفسى و منى عينى
أمسك عصايه الشمسية أهبدها بيها على دماغها و أخلص منها بس بعد شويه سبت الحقد على جنب و ابتديت أبقى
موضوعيه أكتر و توصلت للنتيجه التاليه الست دى فعلا ماشاء الله مبسوطه ...
وجوزها فرحان بيها أوى و مرتااااااااحه. .
طيب هى فيها إيه زياده عنى حلوة ؟؟
لا هى عاديه اوى و أنا فعلا أحلى منها بكتير بس هى مهتمه
بنفسها أوى..
يعنى اكبر من بسنتين و شكلها اصغر منى بسبعه مع أننا فى نفس المستوى المادى و
عندنا نفس العدد من العيال أومال ايه بقى ؟؟؟
قلت أشغل اللؤم و أحاول أتصاحب عليها..
إن جيتوا للحق الست زى العسل مش زى ما كنت فاكراها خالص و هى اللى فتحت الموضوع أول حاجه قالتهالى إنتى عامله فى نفسك كده ليه ؟؟؟..
ده أنا كنت لسه ها احبك ياوليه. ....
ماعلينا
....
قولتلها عامله ازاى ؟؟؟؟
قالت لى مبهدله قووووى بصى ضوافرك مكسره وايديكى مقشفه كعوبك مشققه طرحتك ملووحه و شعريتين
بيض طالعين من الجناب بلوزتك مبقعه وشك كله شراشيب. .
طبعا انا مكبوسه كبسه الفول المدمس قولتلها اختصرى و قولى
غوريلا
و بعدين أفضى
لنفسى إمتى أنا طول النهار وراهم.
إنتى مش شايفه ؟؟؟
قالت لى دى غلطتك إرمى عليه شويه طول ما إنتى شايله لوحدك حتفضلى كده ..
وإبتديت أتفرج عليها و أقارن ..
هى يا تشيل البيبى يا تمسك ايد بنتها هى حاجه و جوزها حاجه. .
أنا باشيل النونو و امسك ايد بنتى و شنطه الحاجات و جوزى ماشى لوحده قداااام باشا و
أنا الشغاله بتاعتهم.
.
لو حاجه بايظه فى البيت تقول له و تسيبها بايظه لحد ما يجيب الراجل يصلحها دى
مسؤليته مش مسؤليتها إنما أنا أكلم اللى ها يصلح و أخد ميعاد...
وأجيب ماما تقعد معايا لو هو مش فاضى
... ده لو ما اتبرعتش و صلحتها أنا يعنى بقى منظر معتاد إن جوزى يرجع
من بره يلاقينى ماسكه مفك و با اصلح فيشه متجوز عم حنفى الكهربائى هو. .
ناولت جوزها باكو الكلينكس و قالت له افتحه يا بيبى صوباعى واجعنى و فتحه بيبى و هو على قلبه زى العسل بالمربى ..
ليه بقا لانها بينت له انها محتاجه له يفتح حاجه ساقعه, برطمان مايونيز , يشيل الترابيزه
, ينزل الستاره.
..
إنما محسوبتكم يروح و يجى يلاقينى جايبه السفره بالنيش و البوفيه مكان الأنتريه طيب ما الراجل متجوز الشحات مبروك
أتدلع إزاى بعد كده ؟؟؟؟؟
اللى توصلت له
----------------------
أولا...
إنك لازم
تبينى لجوزك إنك محتاجه له لأنك ست و ضعيفه و رقيقه و هو القوى اللى بيعمل اللى إنتى متعرفيش و لا تقدرى
تعمليه.
.
حتى لو تعرفى إستهبلى. .
الحاجه التانيه
....
خدى بالك من نفسك البسى جوانتى و إنتى بتغسلى المواعين ,و حطى
كريم فى رجلك قبل ما تلبسى الشراب
, حطى روج ده
جوزك يا أوختى مش عيب
, سرحى
التسريح حلو برضه
, ثالثا
ورابعا وحتى
الف و تسعماية
...
إتمسكنى دموعك أقوى حاجه عندك....
من غير ما تبقى زناته. ..
تفتكروا حا نعرف ؟؟؟؟
أهو نحاول.....
يمكن نفلح.
.
أيتها الستات إتدلعوا قبل ما نروح فى داهية
.
=========================
والحقيقة التجربة في رأيي مهمة لكل زوجة ولكل عروس مقبلة
على الزواج ببساطة لأنها داخلة في دروس ترويض الرجل ربنا يهدينا جميعا ويصلح حال كل البيوت
ـــــــــــــــــــــ
نقلتها لكم
فاتن نصر