بقلم التهامى زيدان
هذه المقالة تعبر عن رأى الكاتب وعلى مسئوليته دون تدخل من الموقع...
تفسيرات غبيه تجدها هذة الايام لنزول الدولار السريع هذا ومنها أن الاجازة السنويه للصين هى من تسببت فى النزول الحاد للدولار ..ناهيك عن تفسيرات أغبى ...
ازاي الدولار بينزل ومفيش تصدير ولا سياحة ولا انتاج ولا استثمارات شوفناها حصلت في الفترة اللي فاتت ومفيش اي حاجة تتسبب في النزول دة في سعر الدولار!
دى اغبي واجهل واتفه جملة ممكن تسمعها كتحليل للي بيحصل
لان اللي حصل بداية من يناير مش عادي
مش بس ان الجنيه بيستعيد قوته بدرجة متسارعة وآخذة في النمو كل يوم اكتر من اليوم اللي قبله
كمان كان فيه شبه تغطية استثنائية لمستجدات اقتصادنا في الاعلام العالمي
في الاسبوع اللي فات
رويترز كتبت تقريرين عن موضوع واحد في الاقتصاد المصري في اقل من 18 ساعة
وبلومبرج كتبت 5 تقارير في 48 ساعة عن نفس الموضوع
الموضوع دة هو مستجدات الاقتصاد المصري
بناءا علي المستجدات دى هنفهم تفسير اللي بيحصل وهنفهم اشمعنة اخر 3 اسابيع بالذات حصل فيهم كدة
اولا الاخبار والمستجدات
:
1 -ارتفاع ملحوظ في الاقبال الاجنبي علي شراء اذون الخزانة المصرية
دة دليل علي ارتفاع الثقة بالاقتصاد المصري ودة ادي لانهيار الفايدة 3% مرة واحدة
ودى شرحتها في البوست اللي تحت دة
2 - تاني اقبال اجنبي كبير ومحل تغطية عالمية
كان علي طرح السندات المصرية الدولارية في السوق الدولي بقيمة 4 مليار $
3 - ارتفاع الاحتياطي ل26.3 مليار $
4 - ثم رفع حظر السفر من الدول الاسكندنافية واخبار عن قرب رفع الحظر الروسي وعودة السياحة
5 - بالاضافة لتصريح البنك الاوروبي للاعمار والتنمية بانخفاض شكاوي الشركات الاجنبية فى مصر من مشاكل نقص العملة مقارنة بفترة ما قبل تحرير الصرف
دى المستجدات ...
ثانيا :
ايه اللي حصل في السوق علي ارض الواقع خلي الجنيه يرتفع قيمته امام الدولار ؟
1 - ارتفاع تحويلات المصريين بالخارج 15%
بقيمة اجمالية 3.3 مليار $ فى شهري نوفمبر وديسمبر
2 - ارتفاع حصيلة الدولار من تنازلات المواطنين بصورة كبيرة جدا خوفا من تكبدهم خساير لو احتفظوا بالدولار
ودة ارتفع بالحصيلة ل5.5 مليار $ في اخر 40 يوم فقط
اغلبها في اخر 14 يوم
منهم 1مليار و185 مليون $ في يومين فقط
وبمعدل يومي متوسطه 550 مليون $
3 - ارتفاع الصادرات 8.5% وانخفاض الاستيراد 15% في يناير
4 - وانخفاض مدفوعات الفيزا في الخارج بنسبة 71%
5 - بالاضافة الي انه زي ما قالت بلومبرج
انه تم سداد جزء كبير من الباكلوج بالدولار
باكلوج بالدولار :
يعني طلبات متراكمة بتقدمها الشركات للبنوك
لتدبير دولار للشركات لكن البنوك موفرتهاش
و بترجع بعضها ل 2015 طلبات في هيئة تحويل ارباح او انشطة شرائية من الخارج
بسبب نقص العملة الصعبة
ولكن لم يتم تدبيرها للشركات وقتها
ودلوقتي تم حل معظمها
للاسباب دى كلها ارتفع المعروض من الدولار و انخفض الطلب عليه اكتر
وبالتالي زى اي سلعة الطلب عليها بيقل والعرض بيزيد فسعرها بينزل
ثالثا :
السؤال دلوقتى هل هيواصل الانخفاض و مش حيرتفع؟
دة محتمل جدا "فى حالة ثبات العوامل الاخري"
ولم تحدث اي احداث غير طبيعية او طارئة ولا تم اتخاذ قرارات جذرية مفاجئة
او ان السوق اتحرك بشكل مختلف وزاد الطلب عن العرض عكس دلوقتي ... اكيد هيرتفع تاني
لكن الدولار مازال بينخفض بشكل ملحوظ جدا حتي وقت كتابة المقال
رابعا :
فقرة الاشاعات والتخاريف
1 - هل احتفالات راس السنة الصينية ليها دخل بالموضوع ؟
دة هذيان
ولو حتي سلمنا بصحة هذيانهم
فالاحتفالات خلصت في الصين والسوق رجع لطبيعته 3 فبراير الحالي زي ماهتشوفو في المصادر وفي اول تعليق من مصادر صينية مرموقة زى تشاينا ديلي
ثانيا الاستيراد مش مقفول بلاش كلام فارغ
احنا دولة ماضية اتفاقيات ومعاهدات تجارة حرة وعضو في منظمة التجارة العالمية
الاستيراد انخفض بسبب انخفاض الطلب والاستهلاك ورفع المواصفات القياسية لجودة المنتجات داخل مصر
واي حد بيروج للقصص دى اعرف انه مستفيد او جاهل حتي لو مستتر خلف جوب تايتل محترم زى "خبير اقتصادي" بتوع منتدي فتكات لانه عيب حد دخل مدارس يقول "الصين قافلة" مش حضانة هي والله
2 - خبير اقتصادي مجنون تاني طلع قالك "اصل احنا خدنا قروض كتير ودة السبب في الانخفاض ولما نسددها هيرتفع !"
ايه الهذي دة
ايه علاقة القروض بالموضوع اصلا
القروض الدولارية اصلا بتنضم للاحتياطي
والاحتياطي لايستخدم اطلاقا في دعم العملة وملوش دعوة بالقصة دى
الاخ دة تقريبا عايش في عصر ماقبل تحرير سعر الصرف
وميعرفش اننا في مصر اصبحنا سوق صرف حر ومرن لا يتدخل فيه البنك المركزي
حد يعمل للاخ دة ابديت يا جماعة ونبي
او يصحيه مالنوم
3 - خبير تالت صرح لمواقع الدرجة التالتة وبير السلم قال
" اصل احنا بعنا للاجانب اذون خزانة ب2 مليار $
ودى اموال ساخنة ولما ياخدوها الدولار هيقفز ! "
تاني انت !!!
الاخ بردو مش مدرك انه بيتكلم عن دولة تانية تقريبا نيجيريا
هنعلمه اقتصاد من اول وجديد لان واضح انه ميعرفش ان حصيلة بيع اذون الخزانة تذهب للاحتياطي الدولاري والاحتياطي قولنا انه لايستخدم اصلا في السوق لانه سوق حر والمركزي لا يدعم الجنيه من 3 نوفمبر 2016
والاذون ملهاش اي علاقة من قريب او بعيد بانخفاض الدولار
كل الاسباب اللي ذكرتها فوق اللي ادت لارتفاع الجنيه او انخفاض الدولار ...
دي اسباب سوقية في الجهاز المصرفي
ملهاش علاقة بالبنك المركزي ولا الاحتياطي ولا الدولة
*دي الف باء مادة اقتصاد كلي في سنة اولي اقتصاد
السؤال الاهم :
امتي دة هينعكس علي الاسعار ؟
التضخم هينخفض الشهر الجاي او اللي بعده بالكتير ودى كتبتها كتير سابقا
انخفاض التضخم يعني ارتفاع الاسعار بوتيرة ابطأ واهدأ فقط
لكن فيه سلع فعلا هتنخفض اسعارها سريعا زي العربيات والحديد والاسمنت
بالنسبة للسلع الغذائية اكثر السيناريوهات تفاؤلا ان اسعارها هتثبت ثم تنخفض بشكل طفيف ومتدرج لحد مالاقتصاد يتحرك بشكل اسرع واقوي والنمو يرتفع بنهاية 2017
بشكل عام تأثير الاصلاحات علي حياتنا ومستوي معيشة الناس محتاج وقت متوسطه نهاية 2017
لكن اللي بيحصل حاليا مؤشر كاشف ومهم اننا ماشيين صح ومحتاجين فقط المثابرة والاستمرارية وعدم الالتفات للجهلة والخبراء الاستراتيجيين
والحمدلله علي عدم تغيير وزير المالية ولا محافظ المركزي في التغييرات الاخيرة
شكرا لكم
اخيكم التهامى زيدان