السيد محافظ الجيزه ... انا وراك .. وراك ! هكلمك بالعامية عشان انا بنت بلد وبحب البلد ومفروسة منك!!
فيصل والمطبعه قدام الشبراوي الناس اللي مالهاش حق تركن في شوارع اللي جابوكم!
القهاوي اللي سايبها متاخده في وسط الشارع بوضع اليد ..
الكاوتش اللي ماليينه اسمنت ولزقينه في الارض !
القمامه اللي قدام المطبعه ..
الامن اللي علي الناصيه واقف يتفرج علي التكاتك اللي بتتداول المخدرات قدام عينهم والميكروباصات المخالفه اللي سدا الشارع وواقفه في نصه ولا ليها ظابط ولا رابط ..
حضرتك واقف هناك ليه حد قالك أقف هنا فوقفت هنا ولا ايه !
مهمتك ايه بالظبط !!!!!!المظاهرات !
اي مخالفات تانيه بتتفرج بس عليها !
دي منطقه المطبعه خد عندك بأه بقيت فيصل والهرم وش العريش !
الهرم الشارع اللي انشاء الله لما السياح يرجعوا بيطلعوا منه للأهرامات اللي بنتباهي بيها !
الشارع اللي سمحتم برخصه لكارفور يفتح هناك ويكمل سده لاخر لحظه لحد ماتوصل للمتحف اللي المفروض السياح برضه يبقوا انشاء الله يزوروه المتحف اللي قبل مايوصلوله يكون اتفرجوا علي التحف اللي حضرتك سايبها بطول الشارع .
ميكروباصات علي تكاتك علي قمامه علي شويه عربجيه ماشين في شارع رئيسي سياحي وكمان عكس الطريق !
لو حضرتك شايف شغلك مايبقاش ده الحال لومره او مرتين في الاسبوع نزلت اديت مخالفه لمحل شاغل الشارع ولا لقهوه متعديه نص الطريق كان الباقي اتعلم ولو نزلت تاني والمخالفه اتضاعفت للمخالف كانت الليله دي كلها خلصت كان يبقي عندنا شارع للعربيات رصيف للبني ادمين كان ممكن تخلص علي نص ميكروباصات البلطجه اللي سايقه من غير رخص !
بلاش ده كله ابسط الامور كنت حققت امن للمواطن اللي بقي ماشي في وسط الطريق !
دى كلها بلاوى أبسط عيل بالجيزة المسئولة منك مخنوق منها ..
للحديث بقية وهكشف فساد كل كرسى باللى عليه..
سلام ....