يكشف الفساد : منصور الجزار
تعالوا نفسر ونفهم... عشان لما نقول المحافظ هيخرب المحافظة يبقى محدش يتفزلك ويدافع عنه ...
من اول السطر .. المحافظ عنده صندوق خدمات فيه فلوس .. بالبلدى عشان الناس تفهم الصندوق ده يحل بيه ازمات المحافظة الطارئة .. وكمان كل شقة فى المحافظة بتدفع فلوس الزبالة على الفواتير .. يعنى فيه فلوس ... يبقى عندنا فلوس للزبالة من الفواتير ومن صندوق الخدمات ... ولما المحافظ يتعاقد مع شركة لتدوير المخلفات .. يبقى اكيد عمل مناقصة لأكثر من شركة .. والمفروض ان الشركة اللى بيتعاقد معها المحافظ بتكسب وتنتج حاجات كتير من المخلفات والقمامة .. ومدام الشركة هتكسب يبقى تشيل اجور العمال والصيانة والاصلاحات وتدفع مبلغ للمحافظة مقابل انها هتلم اكثر من 4000 طن يومى من المحافظة بالبلدى عشان الناس تفهم ( لما يجينى راعى ومستثمر لفريق كورة النادى مبيدفعلوش ولا مليم .. النادى بياخد منه فلوس ) بلاش دى ... ( اتحاد الكرة المصرى لما بيبيع الدورى بملايين ) مش بيدفع حاجة لمن اشتراه .. فهمتوا كده ياناس ... نكمل بلوة محافظ الدقهلية ... البيه تعاقد مع شركة ايكارو .. ياترى خد منها فلوس ولا ..لأ ...وهى ايه شركة ايكارو دى ..
تعالو نعرف نبذة عنها وعن مكاسبها من القمامة...
المهام الرئيسية للشركة المصرية لتدوير المخلفات الصلبة
إنتاج الأسمدة العضوية
خدمات الدفن الصحى و المعالجة
وأعمال الصيانة والإصلاح
منتجات الشركة
تعتبر الشركة المصرية لتدوير المخلفات الصلبة رائدة فى مجال إنتاج الأسمدة العضوية فى مصر والشرق الأوسط ، ويصل معدل نموها السنوى فى هذا المجال إلى أكثر من 20 : 40 % سنويا ، وقد وصل إنتاجها ومبيعاتها من الأسمدة العضوية عام 2006 إلى أكثر من 8000 طن .
منتجات الشركة
سماد القطامية العضوى
سماد العبور العضوى
كمبوست النيــل
السماد الســائل
قش الأرز ( سائب - مكبوس دائري - مكبوس مستطيل )
لغاية هنا .. وعاوزين نعرف من المحافظ خد منها فلوس ولا لأ... ولو هو اللى هيدفع ليها مين اللى رشح له الشركة دى ولا الترشيح جاى من فوق.... يبقى فيه حد اكبر منه مدبسه فى التعاقد معاها ويبقى فيه بيزنس وسخ فى الموضوع .. لأنها شركة بتكسب مليارات من ورا القمامة ... الى هنا اللخبطة موجودة .. طيب تعالو نتلخبط كمان .. المحافظ عمل اجتماع على مستوى القاعدة لمتابعة اعمال الشركة .. متابعة فى قاعة اجتماعاته على الورق مش متابعة ميدانية .....
ومن خلال الاجتماع المنشور على صفحة المحافظة ...
الخبر بيقول ان الشركة جهزت مستخلصاتها ...واعطى المحافظ اوامره بسرعة تخليص فلوس الشركة ولم يقل فلوسها كام ... طيب الفلوس دى تعرفوا بتاعت ايه ... بتاعت الشركة اللى خلصت معاينة مدفن قلابشو .. ياسلام عشان الشركة عاينت مدفن زبالة تعطى اوامرك بسرعة حصولها على فلوس ...
وشوفوا المهزلة الثانية المحافظ بيدبس القوات المسلحة اللى هى حاليا بتقوم بإخلاء موقع معدات مقلب سندوب .. هو المحافظ اللى قال بنفسه كده فى الخبر .. وفى نفس الخبر بيطلب من وزير المالية 5 مليون جنيه للشركة بتاعة الزبالة عشان اخلاء الموقع من المعدات اللى القوات المسلحة بتخليه من المعدات .. مع ان الشركة كما قرأنا بالبداية بتنتج وبتصلح وبتعمل صيانة والمفروض انها عندها عمال ..
ومعاكم الخبر الفضيحة من موقع المحافظة الرسمى ...
وخلونى مش فاهم حاجة خالص والمحافظ هو اللى بيفهم .. لما انت متعاقد مع شركة على مستوى المحافظة سايب شعب المحافظة عايش فى الزبالة والوساخة لييييييه .. ولا انت مش بتشوف الزبالة .. ولا انت التقارير بتوصلك ان كله تمام ... ايها المحافظ انا لايهمنى سلطتك ولامركزك ولاخايف منك ولا من اللى اكبر منك ... انت بتخنقنا وبتسرقنا والزبالة فى كل شارع وحارة بتموتنا وبتموت اولادنا .. يعنى من الاخر .. من يساعد على السرقة فهو حرامى ومن يساعد على القتل فهو قاتل .. وللحديث بقية .
واليكم الخبر المكتوب على صفحة المحافظة الرسمية محافظ الدقهلية
العنوان بيقول
المحافظ يتابع أعمال شركة إيكارو لتدوير المخلفات بنطاق المحافظة
27 أبريل، 2014، الساعة 06:38 مساءً
في إطار الاهتمام المتواصل للمهندس / عمر الشوادفى – محافظ الدقهلية بمتابعة الأعمال الجارية لحل مشكلة القمامة بدائرة المحافظة عقد المحافظ اجتماعاً لمسئولي شركة إيكارو لتدوير المخلفات الصلبة وذلك لمتابعة ما تم تنفيذه من قبل الشركة في عمليات المعالجة ولتدوير والتخلص الآمن من القمامة بمراكز المحافظة وإنشاء مدفن صحى بمنطقة قلابشو مركز بلقاس – حضر الاجتماع اللواء/أحمد صالح الإدكاوى وكيل أول الوزارة السكرتير العام والاستاذة/هناء عبد العزيز وكيل الوزارة السكرتير العام المساعد للمحافظة ومسئولي الشئون المالية والإدارية والنظافة والبيئة والشئون القانونية .
وتم خلال الاجتماع استعراض ما تم انجازه من قبل الشركة خلال الفترة الماضية حيث تم رفع كفاءة وإعادة تأهيل مصنع قلابشو- مركز بلقاس لتدوير القمامة وتم التشغيل الفعلي له بطاقة استيعابية قدرها 360 طن/يوم، و تم رفع كفاءة وإعادة تأهيل مصنع أجا- مركز أجا لتدوير القمامة وتم التشغيل الفعلي له بطاقة استيعابية قدرها 360 طن/يوم.
وقامت الشركة بعمل معاينة لموقع مصنع سندب حيث تم تكهين المعدات الموجودة نظراً لتقادمها وعدم الجدوى من إعادة تأهيلها لا نشاؤه منذ عام 1997 على أن تقوم الشركة بوضع معدات متحركة لتدوير القمامة بموقع المصنع بطاقة استيعابية قدرها 800طن/يوم.
وأوضح المحافظ أنه تم التنسيق مع وزارة المالية لدعم المحافظة بمبلغ 5 مليون جنيه لإخلاء موقع المعدات بمقلب سندوب ويتم حالياً رفع المخلفات وإخلاء الموقع بمعرفة جهاز الخدمة الوطنية للقوات المسلحة لوضع المعدات المتحركة كبديل للمصنع لاستقبال قمامة مدينة المنصورة (حى شرق – حى غرب- قرى مركز المنصورة )طلخا والوحدات القروية التابعة لها.
ويشار إلى أن إعادة تأهيل وتشــــــغيل هذه المصانع قد ساهم في حل مشــكلة التخلص من القمامة في كلا من مراكــــز (أجا والوحدات القروية التابعة- السنبلاوين والوحدات القروية التابعة لحين الانتهاء من إنشاء مصنع السنبلاوين- تمى الأمديد والوحدات القروية التابعة- شربين والوحدات القروية التابعة) كما تم تشغيل معدات متحركة بموقع مقلب ميت غمر كحل مؤقت لحين لإيجاد حل أو بديل لمصنع بشلا الذى تم حرقه أثناء ثورة 25 يناير.
وقد وافقت الشركة خلال الاجتماع على تدريب عمال النظافة بالوحدات المحلية على العمل بمصانع التدوير على نفقتها وتوفير زي موحد لهم وصرف حوافز مالية .
كما تقرر سرعة قيام الشركة بالتنسيق مع قطاع النظافة والبيئة بالمحافظة بمعاينة موقع المدفن الصحي بقلابشو على مساحة 50فدان والقيام بعمل الجسات الأرضية للموقع لاتخاذ اٌجراءات اللازمة لتنفيذه.
ووجه المحافظ لسرعة اتخاذ الإجراءات المالية والإدارية اللازمة لصرف المستحقات المالية للشركة بعد قيام الشركة بإعداد المستخلصات الخاصة بهذا الشأن.